"Келажакка қадам" - ёшлар сиёсатининг амалий ифодаси ва ишончли истиқбол йўли

2026-04-21

“Келажакка қадам” — ёшлар сиёсатининг амалий ифодаси ва ишончли истиқбол йўли

Самарқанд давлат ветеринария медицинаси, чорвачилик ва биотехнологиялар университети Нукус филиалида “Келажакка қадам” дастури доирасида битирувчи ёшлар билан учрашув ташкил этилди. Ушбу мулоқот Янги Ўзбекистонда ёшлар масаласи давлат сиёсатининг устувор йўналишларидан бири сифатида изчил эътибор қаратилаётганини яна бир бор тасдиқлади.

Тадбирда филиал раҳбарияти билан бир қаторда Қорақалпоғистон Республикаси Камбағалликни қисқартириш ва бандлик вазирининг биринчи ўринбосари А.Қайратдинов, “Ўзмиллийбанк”нинг “Келажакка қадам” сектори маркази менежери К.Шарипова, “Алоқабанк” ҳудудий маркази вакили Т.Шамуратов ҳамда “Микрокредитбанк” ҳудудий бошқармаси масъул ходими Б.Сапаров иштирок этди.

Учрашувни филиал директори А.Эсимбетов очиб бериб, бугунги тараққиёт босқичида ёшларнинг бандлигини таъминлаш, уларни тадбиркорликка кенг жалб этиш ва мустақил ҳаётга тайёрлаш давлат сиёсатининг муҳим йўналишига айланганини алоҳида таъкидлади. Бу борада олий таълим муассасалари зиммасига ҳам катта масъулият юкланаётгани қайд этилди.

Филиалда жорий йилда 205 нафар битирувчи катта ҳаёт сари йўл олмоқда. Уларнинг 113 нафари бакалавр, 21 нафари магистратура босқичи битирувчилари, 71 нафари сиртқи таълим шаклида таҳсил олган ёшлар ҳисобланади. Бу кўрсаткичлар ҳудудда замонавий билим ва касбий салоҳиятга эга кадрлар сафи изчил кенгайиб бораётганидан далолат беради.

Мулоқот давомида мутахассислар томонидан “Келажакка қадам” дастурининг мазмун-моҳияти кенг ёритилди. Таъкидланганидек, мазкур дастур ёшларни қўллаб-қувватлашнинг янги босқичини бошлаб бериб, уларнинг иқтисодий фаоллигини ошириш, ташаббусларини рағбатлантириш ва реал даромад манбаларини яратишга хизмат қилмоқда.

Айниқса, молиявий кўмак, имтиёзли кредитлар ва амалий маслаҳатлар тизими ёшлар учун кенг имкониятлар эшигини очмоқда.

Дастур доирасида илгари сурилаётган ташаббуслар мазмунан узвий ва босқичма-босқич ривожланишга асосланган. Унда ёшларни тадбиркорликка илк бор жалб этиш, ўз бизнесини шакллантириш, фаолиятини кенгайтириш, инвестицияларни йўналтириш ҳамда дастлабки касбий кўникмаларни мустаҳкамлаш каби жараёнлар ягона тизим асосида уйғунлаштирилган.

Бу ёндашув ёшларнинг ғоясини амалий натижага айлантириш, уларни мустақил иқтисодий субъект сифатида шакллантиришга хизмат қилмоқда.

Бугунги кунда мамлакат миқёсида ёшлар бандлигини таъминлаш масаласи стратегик даражада қаралмоқда.

“Келажакка қадам” дастури эса ушбу сиёсатнинг амалий ифодаси сифатида ҳаётга изчил татбиқ этилмоқда. Натижада ёшларнинг ташаббуслари қўллаб-қувватланмоқда, улар учун янги имкониятлар яратилмоқда, энг муҳими, эртанги кунга ишонч мустаҳкамланмоқда.

Учрашув якунида битирувчилар ўзларини қизиқтирган саволларга батафсил жавоб олди, мутахассислар билан очиқ мулоқот олиб борди. Бу эса ёшларнинг келажак режалари янада аниқ шаклланишига хизмат қилди.

Хулоса қилиб айтганда, “Келажакка қадам” дастури бугунги ёшлар учун муҳим ижтимоий ташаббус бўлиб, уларнинг ҳаётда ўз ўрнини топиши, жамиятда фаол позицияни эгаллаши ва мамлакат тараққиётига муносиб ҳисса қўшишида мустаҳкам таянч вазифасини ўтамоқда.