Media-tur

2025-04-18

Qaraqalpaqstan Respublikası Kámbaǵallıqtı qısqartıw hám bántlik ministrligi tárepinen 16-aprel kúni Ámiwdárya rayonında ótkerilgen Media-tur - bul tek ǵana jergilikli isbilermenliktiń búgingi kúndegi rawajlanıw jaǵdayı emes, al onıń keleshegi haqqında da tereń pikir júrgiziwge shaqıratuǵın ilaj boldı.

    Media-tur dawamında ǵalaba xabar qurallarınıń wákilleri rayonda jańadan jumıs baslaǵan bir qatar óndiris obektlerine bardı.

 Hár bir barǵan obyekt - bul jańadan ashılǵan imkaniyatlar, jańa jumıs orınları hám eń áhmiyetlisi, jergilikli xalıqtıń turmısın jaqsılawǵa bolǵan shın kewilden umtılıw bolıp esaplanadı.

   Isbilermenlerdiń aytıwınsha, olardıń jumısın jolǵa qoyıwda mámleket tárepinen kórsetilgen járdem, atap aytqanda, subsidiyalar hám jeńilletilgen kreditler úlken járdem bolǵan. Búgin olar ózleri jaratqan jumıs orınları arqalı basqa da puqaralarǵa  jańa úmit, jańa imkaniyatlar baǵıshlamaqta.

Media-tur sheńberinde jáne bir dıqqatqa ılayıq tárepi - bul úlgili qıytaq jer iyeleriniń tájiriybesi menen tanısıw boldı. Rayonda kóplegen shańaraqlar óz qıytaq jerlerinen nátiyjeli paydalanıp, nál tárbiyası, palız ónimlerin jetistiriwdi  tabıslı shólkemlestirgen. Bul bolsa tek ǵana shańaraqlıq dáramat deregi emes, al awıllıq jerlerde turaqlı bántlikti támiyinlewdiń úlgisi sıpatında bahalanadı.

   Ámiwdárya rayonında baqlanǵan bul unamlı ózgerisler - bul aymaqta isbilermenlik ortalıǵınıń janlanıp atırǵanınan derek beredi.
Media-tur juwmaǵında jurnalistler tárepinen kórilgen obektler hám ol jerdegi jumıs unamlı bahalanıp, bunday baslamalar pútkil respublika boylap keńnen en jaydırılıwı kerek ekenligi atap ótildi.