Qıytaq jer - dáramat dáregi: Ellikqaladaǵı eń aldınǵı isbilermen tájiriybesi

2025-04-22

Ellikqala rayonı “Shopan” mákan puqaralar jıyınında jasawshı puqara Ismyıl Nurimov tárepinen jolǵa qoyılǵan isbilermenlik iskerligi búgingi kúnde qıytaq jerden únemli paydalanıwda úlgi bolıp xızmet etpekte.

 Ol 2015-jıldan berli óziniń 16 sotıxlı qıytaq jerine jılına 300 mıńnan aslam nál jetistirmekte. Eń áhmiyetlisi, bul miynet nátiyjesinde Ismayıl aǵa jıllıq 150 million sumnan aslam dáramat alıp kelmekte.

 📌 Qıytaq jerde imkaniyatlar barshılıq

 Ismayıl Nurimovtıń jumısı tek ǵana materiallıq jaqtan emes, al sociallıq jaqtan da áhmiyetli. Ol óz aymaǵındaǵı 15 jumıssız puqaranı turaqlı hám máwsimlik jumıs orınları menen támiyinlep kelmekte.

 Rayon kóleminde qıytaq jerde jaslar da, kekselerde jumıs alıp barmaqta, bul bolsa aymaqtaǵı bántlik mashqalasın sheshiwde ornı áhmiyetli.

 Miynet hám sabırlılıq nátiyjesi

Ismayıl aǵa menen sáwbetleskenimizde:

"Jumıstıń bası awır boldı. 

Dáslepki jıllarda jaqsı nátiyje ushın biraz miynet etiwge tuwra keldi. Biraq waqıt ótiwi menen tájiriybe arttı, nál sortların durıs tańlaw hám tárbiyalawdı úyrendim. Endi bolsa tek ǵana dáramat emes, al awıllaslarımada jumıs ornın da jarata aldım"-deydi.

 Házirgi kúnde Nurimovtıń qıytaq jerinde hár qıylı sorttaǵı gúl, miyweli hám sayamanlı terek nálleri jetistirilmekte.

 Suwǵarıw sisteması bolsa- qıytaq jerde tamshılatıp suwǵarıw usılı tiykarında ámelge asırılmaqta. Bul bolsa suw resurslarınan aqılǵa uǵras paydalanıw imkaniyatın beredi.

 “Shopan” máhállesiniń bunday úlgili isbilermenleri aymaqtaǵı basqa puqaralar ushın da úlgi bolmaqta. Qıytaq jerden paydalanıw, ishki talaptı qanaatlandırıw hám bazar ushın ónim jetistiriwdiń anıq kórinisi esaplanadı.

 Eger hár bir shańaraq óziniń 4-5 sotıx jerinen durıs hám nátiyjeli paydalansa, tek ǵana materiallıq támiynat emes, al elimizde azıq-awqat qáwipsizligi hám jumıssızlıq máselesi de sheshim tabadı.

                                                                   Sanavar Jumaniyazova