Búgin Ózbekstan Respublikası Kámbaǵallıqtı qısqartıw hám bántlik ministri Botir Zohidov Qaraqalpaqstan Respublikasına keldi. Bul sapar sheńberinde ol aymaqta jumıs orınların jaratıw, xalıqtı bánt etiw, kámbaǵallıqtı qısqartıw hám turmıs sharayatların jaqsılaw boyınsha alıp barılıp atırǵan jumıslar menen jaqınnan tanıstı.

2025-05-14

Sapar Taxtakópir rayonınan baslandı. Ministr rayondaǵı "Ózbekstan" máhállesinde jaylasqan Sayxunabad tájiriybesi tiykarında jumıs alıp barıp atırǵan B.Usaqovtıń shańaraǵında ámelge asırılǵan jumıslar menen tanıstı. Bul shańaraqlarda xalıqtıń dáramatın arttırıw hám qıytaq jerlerden únemli paydalanıw boyınsha innovaciyalıq joybarlar ámelge asırılmaqta. Sonday-aq, rayondaǵı hákim járdemshileriniń ámelge asırǵan joybarları menen jaqınnan tanıstı.

Bunnan soń, Botir Zohidov "Dawqara" máhállesindegi "Qaratereń" ekoturizm kompleksi boyında ámelge asırılǵan jumıslardı kózden ótkerdi. Bul aymaqta ekologiyalıq turaqlılıqtı saqlaw, jergilikli turizmdi rawajlandırıw hám xalıqtı bánt etiw boyınsha ámelge asırılǵan ilajlar haqqında maǵlıwmat aldı.

Sapar dawamında qıytaq jerden únemli paydalanıp atırǵan, shańaraqlıq dáramatların arttırıwda belsene qatnasıp atırǵan qıytaq jer ieleri menen ashıqtan-ashıq sóylesiwler ótkerildi. Olar óz tájiriybelerin bólisti, bar mashqalalar hám sheshimler haqqında pikir alısıldı. Ministrdiń bul ushırasıwları adamlardıń isbilermenlik kónlikpelerin arttırıw, óz miynetinen kóbirek dáramat alıw imkaniyatların keńeytiw ushın áhmietli qádem boldı.

  Botir Zohidov Qaraqalpaqstan Respublikasına saparı dawamında aymaqlardı sociallıq-ekonomikalıq rawajlandırıw, xalıqtı jumıs penen támiyinlew hám kámbaǵallıqtı qısqartıwǵa qaratılǵan ilajlardı jáne de kúsheytiw kerek ekenligin atap ótti.