Nókis qalasında islep shıǵarılǵan ónimler kórgizbege qoyıldı

2024-12-03

Qaraqalpaqstan Respublikası Joqarǵı Keńesiniń qollap-quwatlawı tiykarında usı jıldıń 30-noyabr hám 1-dekabr kúnleri Nókis qalasında jaylasqan "Aqquw" kompleksinde Nókis qalası isbilermenleri tárepinen islep shıǵarılıp atırǵan ónimlerdiń kórgizbe-yarmarkası shólkemlestirildi.

Ilajda Ózbekstan Sawda-sanaat Palatasınıń Qaraqalpaqstan Respublikası basqarması wákilleri, tiyisli ministrlik, mákeme hám shólkem basshıları, Nókis qalası hám rayonlarda jumıs alıp barıwshı hákim orınbasarları hám hákim járdemshileri, sonday-aq Nókis qalasındaǵı jámi 71 MPJ dan islep shıǵarıw, xızmet kórsetiw, ónermentshilik, ustashılıq, balıqshılıq hám basqa da jónelislerde jumıs alıp barıp atırǵan 120 dan aslam isbilermenler qatnastı.

Ilajdı shólkemlestiriwden tiykarǵı maqset – elimiz isbilermenlerin bunnan bılay da qollap-quwatlaw, sanaat tarawın ele de rawajlandırıw, biznes sub'ektleri tárepinen islep shıǵarılǵan ónimlerdi realizaciya etiwge kómeklesiwden ibarat. 

Ilaj sheńberinde qatnasıwshı isbilermenler tárepinen islep shıǵarılǵan sanaat, mebel, azıq-awqat hám qurılıs ónimleri, sonday-aq, ónermentler tárepinen tayarlanǵan qol miyneti, tiginshilik, zergerlik ónimleri, aǵash  ustashılıǵı, temirden islengen úskeneler, úy xojalıǵı buyımları hám basqa da 1000 ǵa shamalas tovarlar kórgizbege qoyıldı.

Kórgizbe-yarmarkası juwmaǵı boyınsha belsendilik kórsetken bir qatar hákim járdemshilerine hám isbilermenlerge shólkemlestiriwshiler tárepinen tayarlanǵan húrmet jarlıǵı hám bahalı sawǵalar tapsırıldı.Nókis qalasında islep shıǵarılǵan ónimler kórgizbege qoyıldı.