Yangiliklar
Kámbaǵal shańaraqlarǵa isbilermenlik penen shuǵıllanıwı ushın procentsiz ssudalar ajıratıladı
2025-02-19
«Xalıqtı isbilermenlikke tartıw hám bántligin támiyinlew ushın qarjılay járdemler ajıratıw sistemasın jetilistiriwge baylanıslı qosımsha ilajlar haqqında»ǵı Prezident qararı qabıl etildi.
Qararǵa bola, xalıqtı isbilermenlikke tartıw, aylanıs qarjıları menen támiyinlew hám Sociallıq qorǵawdıń birden-bir reestri hám Kámbaǵal shańaraqlar reestrine kirgizilgen shańaraqlardıń aǵzalarına óz jumısın baslawı ushın zárúr bolǵan ásbap-úskenelerdi satıp alıwǵa ajıratılatuǵın subsidiyalar ornına procentsiz ssuda ajıratıw sisteması engiziledi.
Xalıq tárepinen qızıǵıwshılıq bildirilmegen, uzaq dáwir dawamında paydalanılmay atırǵan hám nátiyjeliligi tómen bolǵan subsidiyalar biykar etiledi hám bir-birin tákirarlawshı subsidiyalar birlestiriledi.
Máhállelerdiń qánigelisiwi hám drayver baǵdarlarınan kelip shıǵıp, kámbaǵal shańaraqlarǵa isbilermenlik hám diyqanshılıq penen shuǵıllanıwı ushın grant hám procentsiz ssudalar ajarıtıladı.
2026-jıl 1-yanvardan xalıqqa naq pul túrinde beriletuǵın qarjılay járdemler basqıshpa-basqısh sociallıq karta arqalı ajıratıladı.
2025-jıl 20-martqa shekem Ekonomika hám qarjı ministrliginiń oraylıq apparatı strukturasında Subsidiya, ssuda hám grantlardıń nátiyjeliligin bahalaw hám muwapıqlastırıw basqarması shólkemlestiriledi.
Qararǵa bola, «Kámbaǵallıqtan abadanlıqqa qaray» baǵdarlamasında belgilengen wazıypalardı ámelge asırıw ushın tómendegi jańa túrdegi qarjılay járdemler engiziledi:
– erkinen ayırıw jazasın ótep bolǵan puqaralarǵa olar tárepinen isbilermenlik, arxitektorlıq, ónermentshilik sıyaqlı baǵdarlardaǵı anıq joybarlar ámelge asırılıwı ushın miynetke haqı tólewdiń eń az muǵdarınıń 10 esesine shekemgi muǵdardaǵı subsidiyalar;
– ózin-ózi bánt etpekshi bolǵan jumıssız puqaralardı yamasa kámbaǵal shańaraqlardıń aǵzaların jumıstı bólip alıp islewshi sıpatında jumısqa alǵan isbilermenlerge olardıń aylanıs qarjıların toltırıw ushın hár bir tartılǵan jumıstı bólip alıp islewshi ushın BEMniń 10 esesine shekemgi muǵdardaǵı 3 jılǵa shekemgi múddetke procentsiz ssudalar;
– kámbaǵal shańaraq aǵzalarına óz jumısın baslawı ushın zárúr bolǵan ásbap-úskenelerdi satıp alıwǵa BEMniń 50 esesine shekemgi muǵdardaǵı 6 aydan 3 jılǵa shekemgi múddetke procentsiz ssudalar;
– kámbaǵal shańaraqlarǵa diyqanshılıq hám baǵshılıq shólkemlestiriw ushın diyqan xojalıqlarına suw qudıqların burǵılaw, nasos agregatların satıp alıw, tamshılatıp suwǵarıw sistemasın ornatıw hám elektr tarmaqların tartıw ushın 6 aylıq jeńilletilgen dáwir menen BEMniń 200 esesine shekemgi muǵdardaǵı 5 jılǵa shekemgi múddetke procentsiz ssudalar;
– máhállelerdiń qánigelisiwi hám drayver baǵdarlarınan kelip shıǵıp, óz tájiriybesin 10 ǵa shekem kámbaǵal shańaraqlarǵa úyretken hám olarǵa turaqlı dáramat dáregine iye bolıwına járdemlesken isbilermenlerge hár bir kámbaǵal shańaraq ushın BEMniń 3 esesi, biraq BEMniń 30 esesine shekemgi muǵdardaǵı grantlar.
